მაია ცქიტიშვილმა აბაშის მუნიციპალიტეტში მიმდინარე ინფრასტრუქტურული პროექტები დაათვალიერა

მაია ცქიტიშვილმა აბაშის მუნიციპალიტეტში მიმდინარე ინფრასტრუქტურული პროექტები დაათვალიერა

რეგიონული განვითარებისა და ინფრასტრუქტურის მინისტრმა მაია ცქიტიშვილმა მარტვილისა და აბაშის მაჟორიტარ დეპუტატთან, ოთარ დანელიასთან და აბაშის მუნიციპალიტეტის მერთან, ლევან მაკალათიასთან ერთად  აბაშის მუნიციპალიტეტში მიმდინარე ინფრასტრუქტურული პროექტები დაათვალიერა. 
აბაშის მუნიციპალიტეტში მიმდინარე წყალმომარაგების სისტემის რეაბილიტაციის სამუშაოები დაიწყო 2018 წლის თებერვალში. სამუშაოების დასრულება 2019 წლის თებერვალში იგეგმება, რის შდეგადაც ქალაქ აბაშისა და 9 სოფლის წყალმომარაგება გაუმჯობესდება. პროექტს 12 მილიონი ლარით აზიის განვითარების ბანკი აფინანსებს.  
ქალაქ აბაშაში და მიმდებარე სოფლებში არსებული მაგისტრალური მილსადენი წლებია რეაბილიტაციას საჭიროებს, ვინაიდან მილები, რომლითაც მოსახლეობა სარგებლობს არის აზბესტის და ამორტიზებულია. სიძველის გამო ხშირია დაზიანებები და წყალმომარაგების შეფერხებით მიწოდება. პროექტის ფარგლებში ქალაქ აბაშასა და მიმდებარე 9 სოფელში არსებული 15 კმ. სიგრძის მონაკვეთზე აზბესტის მაგისტრალური მილსადენი შეიცვლება პოლიეთილენის ახალი მილსადენებით. სამუშაოების დასრულების შედეგად, ქალაქისა და ცხრა სოფლის 4 000-მდე მაცხოვრებელი ხარისხიანი წყალმომარაგებით იქნება უზრუნველყოფილი და მომავალი წლის გაზაფხულიდან თანამედროვე სტანდარტების შესაბამისი, განახლებული წყლის ინფრასტრუქტურით ისარგებლებენ.  
აბაშაში ასევე მიმდინარეობს ცენტრალური პარკის აღდგენა-მოწყობისა და სასწრაფო სამედიცინო ამბულატორიის მშენებლობის სამუშაოები. 
 „2019 წლისთვის ჩვენ გვაქვს გათალისიწინებული 14 მილიონამდე ლარის პროექტის განხორციელება აბაშის მუნიციპალიტეტში. არის გათვალისწინებული ახალი სკოლის და 6 ახალი ბაღის მშენებლობაც; რა თმქა უნდა, ბევრი გზის მშენებლობა და სხვა სახის ინფრასტრუქტურა, როგორიცაა ამბულატორიები და მრავალი სხვა კულტურული და სპორტული დანიშნულების ობიექტები,“- განაცხადა მაია ცქიტიშვილმა.